Aprubado na sa Committee on Aquaculture and Fisheries Resources ang House Bill 1083 at HB 3133 na naglalayong magtayo ng Multi-Species Freshwater Hatchery sa Bayan ng Pilar.

Isa sa mga may-akda ng panukala ay si Rep. Jett Nisay ng Pusong Pinoy Partylist, kasama si Cong. Abet Garcia. Layunin ng panukala na palakasin ang lokal na industriya ng pangisdaan sa pamamagitan ng produksyon ng iba’t ibang uri ng isda, na makikinabang ang mga mangingisda at ang buong lalawigan.

Dumalo rin sa pagdinig si Mr. Richard San Diego, Fishery Development Division Chief ng Provincial Government of Bataan, bilang Resource Person, upang ipaliwanag ang implementasyon at benepisyo ng proyekto. Binanggit nila na ang hatchery ay magbibigay ng sapat na pagkain, trabaho, at pagkakataon para sa mga lokal na mangingisda, habang pinapalakas ang agrikultura at industriya ng pangingisda sa rehiyon.

Ayon sa mga kinauukulan, ang pagtatayo ng hatchery ay hakbang upang palawakin ang ekonomiya at kabuhayan sa Pilar at karatig-lalawigan. Patuloy ang suporta ng pamahalaan at mga mambabatas tulad ni Rep. Nisay sa mga programang makatutulong sa mga mangingisda, lokal na industriya, at sa pangmatagalang paglago ng ekonomiya ng Bataan.

The post Panukalang Multi-Species Freshwater Hatchery sa Pilar, Bataan, aprubado na appeared first on 1Bataan.