Bilang paggunita sa ika-127 Araw ng Kalayaan ng Pilipinas, muling magsasanib-puwersa ang SM Supermalls at Department of Labor and Employment (DOLE) para sa Kalayaan Job Fair na gaganapin ngayong Hunyo 12 sa SM City Bataan. Katuwang din sa aktibidad ang Public Employment Service Office (PESO), layunin ng job fair na magbukas ng mga bagong oportunidad sa trabaho para sa mga Pilipinong naghahanap ng mapapasukan.

Hindi lamang ito isang karaniwang job fair—ito’y isang kumpletong oportunidad hub kung saan tampok ang daan-daang lokal at overseas employers, libu-libong job openings, on-the-spot hiring, at mga serbisyo mula sa iba’t ibang ahensiya ng gobyerno gaya ng SSS, Pag-IBIG, PhilHealth, at NBI. Bukas ito para sa mga bagong graduate, mga beteranong propesyonal, at mga balikbayan na OFW na naghahanap ng panibagong career move.

Ang Kalayaan Job Fair ay isa sa mga regular na inisyatibo ng SM Supermalls katuwang ang DOLE at iba pang partner agencies upang isulong ang trabaho at pagpapaunlad ng komunidad. Sa pamamagitan ng mga ganitong aktibidad, layunin ng SM na gawing mas abot-kamay at inklusibo ang paghahanap ng trabaho para sa bawat Pilipino.

The post Kalayaan Job Fair, gaganapin sa SM City Bataan sa Hunyo 12 appeared first on 1Bataan.